Даваа гараг AFP агентлагаас мэдээлснээр 56 настай саятан Лян Ши БНХАУ-ын элсэлтийн ерөнхий шалгалтыг 27 дахь удаагаа өгч, унажээ.
Лян Шигийн хувьд цагтаа үйлдвэрт ажиллаж байсан ч хожим барилгын материал нийлүүлэх бизнес эрхлэн саятан болсон нэгэн юм. Түүний хувьд их сургууль, коллежид сурах шаардлага үгүй ч үргэлж их сургууль, коллежид суралцахыг хүсэж иржээ.
Лян Ши элсэлтийн шалгалт өгөхөөс өмнө нэгэн ярилцлагад өгүүлснээр, “Коллежийн боловсрол эзэмшиж чадаагүй гэдгээ санах нь надад тааламжгүй байдаг. Би үнэхээр их сургуульд орж, сэхээтэн болмоор байна” гэж байсан юм.
Тэрээр 1983 онд буюу 16 настайдаа элсэлтийн шалгалт өгч эхэлсэн ч дунд нь хэд хэдэн удаа завсардаж, энэ онд шалгалтаа дахин өгсөн ч хамгийн доод босго онооноос 34 оноо дутсан гэнэ. Тийнхүү үйл явдлын хүрээнд Лян Ши мөрөөдөлдөө бууж өгөх эсэх асуудлыг нухацтай бодож үзэх болжээ.
Эх сурвалж: AFP