Хүүхэд хоёроос гурван нас хүрэх зуур гэр бүлийн хүрээний ойр зуурын ярианы хэлийг бүрэн ойлгож өөртөө тохирсон хэмжээнд ярих чадварыг эзэмшсэн байдаг. Харин хорин настай залуусын тухайд гадаад хэл сурах гэдэг тун амаргүй хэрэг болон хувирдагийн нууц юунд оршдог вэ? Энэ асуултанд гадаад хэлийг сурахтай холбоотой хувь хүний зүгээс хамаарах бэрхшээл нуугдаж байгаа юм. Манай олонхи хүмүүс энэ асуултанд “Хүүхэд бага байхдаа хэл сурах авьяастай байдаг. Харин том болохын хэрээр тэр авьяас нь алга болчихдог юм гэнэ лээ.” гэсэн иш үндэсгүй явган яриагаар хариулж бие биеийнхээ сурах идэвхийг бууруулж байдаг нь ч нууц биш.