Бямба гарагт "Formula E" дэлхийн аварга шалгаруулах тэмцээнийг Япон улс анх удаа зохион байгуулж, Токиогийн гудамжуудад бүрэн цахилгаан хөдөлгүүртэй автомашинууд уралдлаа.

Нийслэл хотын Кото дүүрэгт байрлах "Tokyo Big Sight" төвийн эргэн тойронд байгуулсан 2.6 км урт түр тойрог зам нь дүүргийн нийт автозамын тал хувийг эзэлжээ.

"Formula E"-гийн машинууд нь "Formula-1"-ийн машинуудтай харьцуулахад байгаль орчинд ээлтэй гэдгээрээ давуу бөгөөд хөдөлгүүрээс утаа ялгардаггүй, дуу чимээ багатай байдаг.

Японы Ерөнхий сайд Кишида Фүмио, Токиогийн захирагч Коикэ Юрико нар "Tokyo E-Prix" тэмцээний нээлтийн ёслолд оролцсон байна.

Уг уралдаанд “Масерати” багийн герман нисгэгч Максимилиан Гюнтер түрүүлж, “Ниссан” багийн англи нисгэгч Оливер Роуланд удаалжээ.

Бямба гарагт болсон 11 багийн 22 машин өрсөлдсөн уралдаан болон бусад холбогдох арга хэмжээг 20 мянга орчим хүн үзэж сонирхсон байна. Уралдааныг үзэхээр Кавасаки хотоос гэр бүлийнхээ дөрвөн гишүүний хамт ирсэн 35 настай Тошиюүки Ниши хэлэхдээ, машинууд гайхалтай хурдтай боловч бараг дуу чимээ гаргахгүй байгаа нь гайхалтай гэлээ.

"Formula Е"-гийн одоо үргэлжилж буй улиралд 16 уралдааныг зохион байгуулахаар төлөвлөжээ.

Эх сурвалж: OANA /МОНЦАМЭ агентлаг/