Пүрэв гарагт олон улсын криптовалютын зах зээлд биткоины ханш дахин өсөж, нэгж биткоины үнэлгээ сүүлийн хоёр гаруй жилийн хугацаанд анх удаагаа 61,000 ам.долларыг давжээ. Тэгвэл пүрэв гарагийн 10:15 минутын байдлаар нэгж биткоины үнэлгээ 61,206.35 ам.доллар байна.

Биткоины ханшийн хувьд хамгийн сүүлд 2021 оны арваннэгдүгээр сард 61,000 ам.долларын үнэлгээтэй байсан ч түүнээс хойш тасралтгүй унасан юм. Харин пүрэв гарагт тус валютын үнэлгээ хамгийн ихдээ 63,734.07 ам.долларт хүрчээ.

Тийнхүү биткоины ханш өсөхөд уг коины ханшийг даган хэлбэлздэг бусад коины ханш ч өссөн байна. Тодруулбал, нэгж эфериумын ханш л гэхэд сүүлийн 24 цагийн хугацаанд 4.85 орчим хувиар өсөж, Улаанбаатарын цагаар 10:20 минутад 3,400.05 ам.долларт хэлбэлзэж байв.

Улмаар зах зээлийн шинжээчдийн таамаглаж байгаагаар энэ маягаар биткоины ханш өссөөр ойрын нэг жилийн хугацаанд нэгжийн үнэ 75,000 ам.долларт хүрэх юм.

Эх сурвалж: CoinMarketCap