Австрали дахь шингэрүүлсэн хийн томоохон ордын ажилчид ажил хаялт зарлаад буй энэ үед шингэрүүлсэн хийн гол импортлогч Өмнөд Солонгос, Хятад, Япон зэрэг Азийн орнууд төдийгүй дэлхийн байгалийн хийн зах зээлд сөргөөр нөлөөлөх вий гэх болгоомжлол олон улсад үүсээд байна.
Ройтерс болон Франс Пресс агентлагуудын мэдээлснээр, АНУ-ын газрын тосны Шеврон компанийн эзэмшдэг Баруун Австрали дахь Уитстоун болон Горгон хийн ордын ажилчид орон нутгийн цагаар 8-ны өдрөөс хэсэгчилсэн ажил хаялтыг зарлаад байгаа бөгөөд 14-ний өдрийг хүртэл үргэлжлүүлэх төлөвлөгөөтэй байгаа талаар онцлов. Цалин хөлс, хөдөлмөрийн нөхцөлтэй холбоотой маргааныг шийдвэрлэхгүй бол ойрын хоёр долоо хоногт бүх нийтийн ажил хаялт зарлахаа мөн мэдэгдсэн байна.
Австрали бол шингэрүүлсэн хийн экспортоор дэлхийд тэргүүлэгч бөгөөд ажил хаяад байгаа Уитстоун болон Горгон хийн ордууд нь дэлхийн шингэрүүлсэн хийн нийлүүлэлтийн 7 орчим хувийг дангаар бүрдүүлдэг аж.
Ажил хаялтын тухай мэдээ тархах үед Европын зах зээл дээрх байгалийн хийн үнэ нэг өдрийн дотор 12 орчим хувиар өссөн юм.
Эх сурвалж: MBC