Ройтерс агентлагийн мэдээлснээр БНСУ-ын автомашин үйлдвэрлэгч Hyundai болон Kia компаниуд гал гарах эрсдэл бүхий 91 мянган шинэ автомашинаа АНУ-ын зах зээлээс эргүүлэн татахаар болсноо мэдэгджээ.

Энэхүү шийдвэрийн хүрээнд 2023-2024 оны Hyundai Palisade, 2023 оны Tucson, Sonata, Elantra, Kona, 2023-2024 оны Seltos, 2023 оны Kia Soul болон Sportage зэрэг загварууд багтаж байгаа юм.

Hyundai, Kia компаниуд эргүүлэн татах болсон шалтгаанаа тайлбарлахдаа автомашин зогсоход хөдөлгүүрийг автоматаар зогсоодог систем болох ISG шатахууны насосны цахилгаан хянагч дахь зарим эд ангиуд гэмтэлтэй байж болзошгүйн улмаас хэт халалт үүсэх эрсдэлтэй хэмээн мэдэгджээ.

Түүнчлэн компаниудын зүгээс хэрэглэгчдэд сануулахдаа дилерүүд автомашинд тань асуудал байгаа эсэхийг шалгаж, шаардлагатай бол шатахууны насосны цахилгаан хянагчийг сольж өгөх болно гээд дээр дурдсан загварын тээврийн хэрэгсэл эзэмшигчдийг засвар үйлчилгээ авах хүртлээ автомашинаа гадаа зогсоол дээр байрлуулахыг хүссэн байна.

Эх сурвалж: YTN