Судалгаагаар Японы нийт хүн амын 30 орчим хувийг 65 ба түүнээс дээш насны иргэд эзлэж байгаа аж.

Тус улсын Дотоод хэргийн яам, Харилцаа Холбооны Яамнаас 19-ний өдөр нийтэлсэн хүн амын статистик мэдээгээр 65 ба түүнээс дээш насны иргэдийн тоо 36.4 саяд хүрч, өнгөрсөн оныхоос 220 мянгаар нэмэгджээ.

Нийт хүн амын дунд ахмад настны эзлэх хувь өмнөх оноос 0.3 пунктээр өсч 29.1% болж, урьд өмнө байгаагүй өндөр үзүүлэлт гарсан байна. Ингэснээр тус улс 65 ба түүнээс дээш насныхны нийт хүн амд эзлэх хувиараа дэлхийд тэргүүлээд байгаа юм.

Мөн 23.6%-иар хоёрдугаарт бичигдсэн Итали болон 23.1%-иар гуравдугаарт бичигдсэн Португал улсуудаас бүтэн 5%-иар илүү байгаа юм.

Японд өндөр настнуудын ажил эрхлэлтийн түвшин 25.1%-д хүрч 9 дэх жилдээ өссөн үзүүлэлттэй гарчээ.

Өнөөдөр буюу 9-р сарын 20-ны өдрийг тус улсад “Ахмад настнуудыг хүндэтгэх өдөр” хэмээн тэмдэглэж бүх нийтээр амардаг байна.

Эх сурвалж: SBS