Мягмар гарагт Газын зурвас дахь нэгэн эмнэлгийг бөмбөгдөж, бөмбөгдөлтийн үеэр эмнэлэгт байсан хэдэн зуун жирийн иргэн амиа алджээ. Улмаар Газын удирдах албан тушаалтнуудын мэдэгдсэнээр амиа алдсан хүмүүсийн тоо 500 хүрч байгаа гэсэн юм.
Харамсалтай нь одоогийн байдлаар хэн эмнэлгийн байгууламжийг бөмбөгдсөн талаар тодорхой мэдээлэл үгүй ажээ. Палестины исламист Хамас бүлэглэлийн зүгээс эл бөмбөгдөлтөд Израиль улсыг буруутгасан бол Израилийн зүгээс Палестины зэвсэгт бүлэглэлүүдийг буруутгасан байна.
Хамас бүлэглэлийн мэдэгдсэнээр “Энэ төрлийн бөмбөгдөлт нь дайны гэмт хэрэг мөн” хэмээсэн ч Израиль улс бөмбөгдөлттэй холбоо хамааралгүй гэдгээ хэлж, Палестины Жихад бүлэглэлийн харвасан пуужин эмнэлгийн байгууламжийг сүйтгэсэн гэжээ.
Гэсэн хэдий ч Палестины исламист Жихад бүлэглэл эмнэлгийг бөмбөгдөөгүй хэмээж байгаа юм.
Үйл явдлын хүрээнд олон улсын удирдагчид харамсалтайгаар амиа алдсан ард иргэдийн гэр бүлд эмгэнэл илэрхийлсэн бөгөөд Йордан, Египет, Палестины эрх баригчид лхагва гарагт АНУ-ын ерөнхийлөгч Жо Байдентай хийхээр төлөвлөөд байсан дээд хэмжээний уулзалтаа цуцалжээ.
Эх сурвалж: BBC