Даваа гарагт дижитал хөгжмийн үйлчилгээ үзүүлэгч Spotify компанийн захирал Даниел Эк BBC сувагт ярилцлага өгчээ.
Энэхүү яриандаа тэрээр Spotify компани хиймэл оюун ухаанаар бүтээсэн хөгжмийн хүрээнд ямар арга хэмжээ авах талаар дэлгэрэнгүй өгүүлсэн байна. Улмаар ярилцлагын хүрээнд түүний мэдэгдсэнээр тус компани хиймэл оюун ухаанаар бүтээгдсэн контентыг дуу хөгжмийн стрийминг платформоосоо бүрмөсөн хориглохгүй гэжээ.
Spotify платформын хувьд энэ оны эхэнд дуучин Drake болон The Weeknd-ийн хоолойг хувилан хиймэл оюун ухаанаар бүтээсэн дууг платформоосоо буулгаж байсан юм.
Ноён Экийн хэлснээр тэд хөгжим бүтээхэд технологийн дэвшлийг ашиглахыг хориглохгүй гэсэн ч хиймэл оюун ухааныг ашиглан алдартнуудын дуу хоолойг тэдний зөвшөөрөлгүйгээр ашиглах ёсгүй гэжээ. Мөн түүний үзэж байгаагаар хөгжмийн салбарт хиймэл оюун ухааныг ашиглах асуудал нь цаашид ч хэдэн арван жилийн турш олон нийтийн мэтгэлцээний гол сэдвүүдийн нэг байх гэнэ.
Эх сурвалж: BBC