Стрийминг үйлчилгээ үзүүлэгч Netflix компани өнгөрөгч улиралд нийт хэрэглэгчдийнхээ тоог 5.9 саяар нэмжээ. Үүний нууц нь тэд хэрэглэгчид өөр хүмүүстэй нууц үгээ хуваах боломжийг хаасантай холбоотой юм.
Гэсэн хэдий ч энэ оны хоёрдугаар улирлын тайлангаас үзэхэд тус компанийн улирлын орлого урьдчилсан тооцоонд хүрч чадаагүй байна. Тодруулбал, өнгөрөгч улиралд тэд нийт 8.2 тэрбум ам.долларын орлоготой ажилласан бөгөөд энэ нь 2022 ны мөн үетэй харьцуулахад даруй 2.7 хувиар өссөн үзүүлэлт юм. Гэвч шинжээчдийн таамаглаж байснаар өнгөрөгч улиралд тус компанийн орлого 8.3 тэрбум ам.долларт хүрэх байжээ. Улмаар хоёрдугаар улирлын тайланг танилцуулсны дараагаар тэдний нэгж хувьцааны үнэлгээ 8.9 хувиар буурсан байна.
Үйл явдлын хүрээнд Netflix компаниас мэдэгдсэнээр энэ оны сүүлийн хагаст тэдний орлого эргэн нэмэгдэнэ гэжээ.
Эх сурвалж: The Reuters