Их Британи улсад анх удаагаа усан чандрын үйлчилгээ нэвтрэх болжээ.
Резомаци гэх энэ үйлчилгээ нь калийн гидроксид болон усыг ашиглан хүний бие цогцсыг задалдаг бөгөөд уламжлалт чандарлах аргаас ч илүү байгальд ээлтэй хувилбарт тооцогддог юм. Резомаци хийхэд нийт 4 гаруй цаг шаардлагатай ч ердийн чандарлах үйл явцтай харьцуулахад даруй 10 дахин бага цахилгаан зарцуулж, хүлэмжийн хий бараг л ялгаруулдаггүй гэнэ.
Үйл явцыг дэлгэрүүлэн авч үзвэл, цогцсыг том, хэвтээ, цилиндр саванд хийж, калийн гидроксидтой усаар дүүргэн савыг халаахад химийн урвал явагдан хүний махан бие задардаг байна. Тийнхүү махан бие задарч үгүй болсон хойно араг ясыг нунтаглан ар гэрийнхэнд нь өгдөг ажээ.
Энэхүү аргыг Канад, Өмнөд Африк болон АНУ-ын олон мужид ашигладаг ч Их Британи улсад санал болгодоггүй байсан юм. Харин ням гарагт BBC агентлагаас мэдээлснээр Co-op Funeralcare компани ирэх оноос тус үйлчилгээг Их Британи улсад нэвтрүүлнэ гэжээ.
Эх сурвалж: BBC