“Парис-2024” Олимп, Паралимпын наадмын албан ёсны зурагт хуудсыг зохион байгуулагчид даваа гарагт олон нийтэд танилцууллаа.
Парисын Орсе музейд дэлгэн үзүүлсэн уг зурагт хуудас нь Олимпод зориулсан зүүн тал, Паралимпод зориулсан баруун тал гэсэн хоёр хэсгээс бүрдэнэ.
Олон янзын өнгийг ашиглан бүтээсэн өнгөлөг зурагт хуудасны төв хэсэгт Эйфелийн цамхаг, мөн наадмыг зохион байгуулах гол газар болох “Стад де Франс” цэнгэлдэх хүрээлэнг дүрсэлжээ.
Харин эргэн тойронд нь марафон, спорт авиралт зэрэг тэмцээнүүдийг олон хүн үзэж байгаагаар дүрсэлсэн байна. Түүнчлэн наадмын бэлгэдэл “Phryges” нь найман газарт нуугдаж байгааг зохион байгуулагчид хэллээ.
“Парис-2024” наадмын бэлгэ тэмдэг болох зурагт хуудсыг Францын зураач Уго Гаттони бүтээжээ. Алдартай брэндүүдийн бүтээгдэхүүний загварыг зохион бүтээдэг тэрбээр зурагт хуудсыг бүтээхэд нийт 2000 цаг зарцуулсан байна.
Зурагт хуудасны аварга том хувилбарыг Орсе музейд гуравдугаар сарын 4-10-ны өдрүүдэд дэлгэн үзүүлнэ. Зурагт хуудаснуудыг Орсе музейгээс болон “Парис-2024” наадмын цахим хуудаснаас худалдан авах боломжтой.
Парисын Олимп долоодугаар сарын 26-нд, Паралимп наймдугаар сарын 28-нд тус тус эхэлнэ.
Эх сурвалж: Olympics /МОНЦАМЭ агентлаг/