Орон нутгийн цагаар 24-ний өдөр АНУ, Их Британийн цэргүүд Улаан тэнгист энгийн иргэдийн хөлөг онгоц руу довтолсоор байгаа Йемений Хусит босогчдын байгууламжууд руу цохилт өгсөн талаар АНУ-ын Төв командлал мэдэгдэв.
Цэргийн төв командлал хэлэхдээ, "Орон нутгийн цагаар 24-ний үдээс хойш Америк, Британийн цэргүүд Австрали, Бахрейн, Канад, Дани, Нидерланд, Шинэ Зеландын дэмжлэгтэйгээр Йемен дэх хуситуудтай холбоотой 18 объектод цохилт өглөө. Энэхүү халдлагын гол бай нь газар доорхи зэвсгийн агуулахууд, пуужингийн агуулахууд, нисгэгчгүй нисэх төхөөрөмжийн систем, агаарын довтолгооноос эсэргүүцэн хамгаалах системүүд байлаа” хэмээн онцолжээ.
Үргэлжлүүлэн "Хуситуудын хууль бус халдлага Йемен рүү чиглэсэн хүмүүнлэгийн тусламжийг тасалдуулж, Ойрх Дорнодын эдийн засагт хохирол учруулж, байгаль орчныг сүйтгэсээр байна. Энэ удаагийн халдлага нь Хуситуудын олон улсын худалдааны хөлөг онгоцнууд руу халдлага үйлдэх чадварыг ихээхэн бууруулсан" гэж нэмж хэлэв.
Энэ халдлагад зориулан Улаан тэнгист үйл ажиллагаа явуулж буй АНУ-ын Тэнгисийн цэргийн Дуайт Эйзенхауэр нисэх онгоц тээгч хөлөг онгоцон дээрх “F/A-18” сөнөөгч онгоцнуудыг ашигласан хэмээн гадаадын хэвлэл мэдээллийн агентлагууд мэдээлсэн байна.
Энэ он гарсаар АНУ, Их Британийн цэргүүд Ираны дэмжлэгтэй Хусит босогчдын эсрэг дөрөв дэх цохилтоо өгсөн нь энэ юм.
Эх сурвалж: MBC