Лхагва гарагт Британийн Sky News сувгаас мэдээлснээр энэ баасан гарагт Японы автомашин үйлдвэрлэн нийлүүлэгч Nissan Motor компани Их Британи улс дахь үйлдвэртээ Qashqai, Juke автомашинуудынхаа цахилгаан хөдөлгүүрт хувилбарыг бүтээх болсон тухай олон нийтэд зарлана гэжээ.
Эх сурвалжийн мэдээлснээр Nissan компанийн эл төсөлд зарцуулах төсөв хэдэн зуун сая фунтээр хэмжигдэнэ гэсэн юм. Гэхдээ энэхүү төсөвт татварын мөнгө багтаагүй бөгөөд эх сурвалжийн таамаглаж байгаагаар Британийн засгийн газраас Nissan Motor компанид татварын хөнгөлөлт үзүүлнэ гэжээ.
Харин эл мэдээллийн хүрээнд Financial Times сониноос мэдээлснээр Nissan Motor компани уг төсөлд зориулж 1 тэрбум гаруй фунтийг төсөвлөсөн гэсэн юм.
Үйл явдлын хүрээнд Ройтерс агентлаг тус компанийн хэвлэлийн төлөөлөгчтэй холбогдсон ч тэд эл мэдээллийг батлах эсхүл няцаахаас татгалзсан байна.
Эх сурвалж: The Reuters