НҮБ-ын Ерөнхий Ассамблейн чуулганд оролцохоор АНУ-ын Нью-Йорк хотод очоод байгаа Бразилийн ерөнхийлөгчийн гудамжинд пицца идэж буй зураг Бразилчуудын шүүмжлэлд өртөөд байгаа юм.
Орон нутгийн цагаар 20-ны өдөр Бразилийн хэвлэл мэдээллийн хэрэгслээр тус улсын Ерөнхийлөгч Жаир Болсонаро нь Нью-Йорк хотын гудамжинд дагалдан яваа албаны хүмүүсийнхээ хамт пицца идсэн талаар мэдээлжээ.
Тэдний гудамжинд хоол идсэн шалтгаан нь Ерөнхийлөгч Болсонаро нь Ковид-19 өвчний эсрэг вакцин хийлгээгүйтэй холбоотой хэмээн таамаглаж байгаа аж. Тус хотод зоогийн газарт хооллохын тулд вакцинжуулалтын гэрчилгээ шаардаж байгаа билээ.
Зарим Бразилчууд Инстаграм хуудаснаа нийтлэгдсэн тус зурагны доор "Улсын нэр хүндийг гутаасан, түүхэн дэх хамгийн адгийн ерөнхийлөгч" гэх зэргээр сэтгэгдлээ хуваалцаж байгаа аж.
Эх сурвалж: Yonhap