Дэлхийд тэргүүлэгч кофе шопын сүлжээ болох Starbucks хэдэн зуун мянгаар тоологдох өөрийн нэрийн кофены шаазан аягыг АНУ-ын зах зээлээс эргүүлэн татахаар болсон талаар Associated Press агентлаг онцолжээ.
АНУ-ын Бүтээгдэхүүний Аюулгүй байдлын албаны зүгээс Starbucks-ийн нэрийн шаазан аягыг хэрэглэдэг зарим хэрэглэгчдээс түлэгдэж, шархадсан гэх гомдол ирсэнтэй холбоотойгоор зах зээлээс эргүүлэн татахаар болсныг орон нутгийн цагаар 21-ний өдөр зарлав.
Энэхүү аягыг хүнсний үйлдвэрлэлээрээ дэлхийд тэргүүлэгч Швейцарийн Nestlé компани үйлдвэрлэсэн бөгөөд өнгөрсөн оны 11-р сараас энэ оны 1-р сар хүртэл Target, Walmart зэрэг АНУ-ын томоохон сүлжээ дэлгүүрүүдээр зарагдсан аж. Тэгвэл энэ удаагийн шийдвэрийн хүрээнд 440.000 аягыг эргүүлэн татахаар болжээ.
Тус албанаас эдгээр аяганууд нь богино долгионы зууханд халаах юм уу, эсвэл халуун шингэнээр дүүргэсэн тохиолдолд хэт халж, хагарснаар түлэгдэх болон гар хуруугаа эсгэх, зүсэх эрсдэл тохиолдож буй талаар мэдэгдсэн байна.
Одоогийн байдлаар уг аягатай холбоотой нийт 12 гомдол бүртгэгдсэний 9 нь хүндэвтэр түлэгдэж, гар хуруугаа цэврүүтүүлсэн гэсэн бол 1 тохиолдол нь хуруугаа зүссэн гэжээ.
Хэрэглэгчид уг аягыг хэрэглэхээ нэн даруй зогсоож, худалдаж авсан газартаа очин буцаах эсвэл Nestle USA компанитай холбогдож мөнгөө буцаан авах боломжтой хэмээн Бүтээгдэхүүний Аюулгүй байдлын алба мэдэгдэв.
Эх сурвалж: MBC