Төмөр хочит Майк Тайсон энэ оны долоодугаар сард тулаанч, YouTuber асан Жэйк Полтой авч үзэх болсон билээ. Улмаар тэдний тулааныг Netflix суваг шууд дамжуулахаа ч мэдэгдсэн.

Тэгвэл өчигдөр 57 настай тулаанч маань мягмар гарагийн үдшийн хөтөлбөрт оролцохдоо тулааны өмнөх сэтгэл зүй ямар байгаа талаараа хуваалцжээ.

Түүний өгүүлснээр, “Надад нэг тийм хачин зан байдаг юм. Энэ тийм ч хачин биш л дээ. Гэхдээ би ямар нэг зүйлийг хийхээс айж байвал түүнийгээ гүйцэлдүүлэхээр зүтгэдэг хүн. Би 2020 онд Ройтой тулалдахдаа ч айж байсан. Тэр үед би 54, 53 настай, байх ёстой жингээсээ 100 паундаар илүү жинтэй байсан. Гэхдээ л би “үүнийг хийцгээе” гэж хэлсэн. Би аливааг хийхээсээ өмнө айж байвал заавал түүнтэйгээ нүүр тулдаг хүн. Энэ л миний зан. Одоо ч би үхтэл айж байна.

Миний итгэж ирснээр сандрал хийгээд зовлон зүдүүр намайг амжилтад хүргэсэн гол түлхүүр юм. Хэрэв би тэдгээрийг мэдрээгүй байсан бол энэ тулааныг хийхээр зөвшөөрөхгүй байх байсан. Гэхдээ энэ тулааны хүрээнд би тэр л мэдрэмжүүдийг мэдэрч байна. Тэр мэдрэмжүүдгүйгээр би хэзээ ч ринг дээр гарахгүй.

Гэсэн хэдий ч тулааны тов ойртох тусам би сандрахаа больж байна. Учир нь энэ бүхэн бодит шүү дээ. Харин бодит байдал дээр би ялагдашгүй нэгэн.

Би түүний 16 байх үеийн хачин бүжиг хийж байгаа бичлэгийг үзсэн. Гэхдээ миний тулалдах эр бол тэр хүү биш ээ. Тэр эр ринг дээр гарч ирж, намайг гэмтээхээр оролдох болно. Би үүнд л бэлтгэгдсэн. Тэр том андуурсан гэдгээ мэдрэх болно” гэжээ.

Эх сурвалж: Fox News