Цаг уурын ажиглалт хийж эхэлснээс хойш хамгийн их хохирол дагуулсан ган гачигтай нүүр тулаад буй Африкийн Замби улс 1 тэрбум ам.долларын яаралтай тусламж хүссэн байна.

Орон нутгийн цагаар 17-ны өдөр Times of Zambia сонинд мэдээлснээр, ган гачигт нэрвэгдээд байгаа Замби улсын ерөнхийлөгч Хакаинде Хичилема 23.5 тэрбум квачагийн яаралтай тусламж хүссэн талаар онцолжээ.

Ерөнхийлөгч Хичилема өмнөх орой нь олон нийтийн ZNBC телевизээр ард түмэндээ хандан хэлсэн үгэндээ “Хэт хуурайшилт, ган гачгийн улмаас манай улсын 20 сая хүн амын 6.6 саяд нь хүнсний тусламж нэн шаардлагатай боллоо. Тиймээс бидэнд 23.5 тэрбум квачагийн яаралтай тусламж хэрэгтэй байна” хэмээн цохон тэмдэглэв.

“Замбид цаг уурын ажиглалт хийж эхэлснээс хойш энэ жил ган гачиг гамшгийн хэмжээнд хүрч очоод байна. Бороо орохгүй байгаагийн улмаас хөдөө аж ахуйн салбар сүйрч, газар тариалан болон бэлчээрт нөлөөлж байна” гэж тэрээр үргэлжлүүлжээ.

"Замбийн засгийн газар, ард түмний нэрийн өмнөөс бид олон улсын хамтын нийгэмлэг, хувийн хэвшил, шашны байгууллагуудаас санхүүгийн болон материаллаг дэмжлэг үзүүлэхийг хүсэж байна" гэж тэр хэллээ.

Замби улс удаан үргэлжилсэн ган гачгаас болж хүнсний хомсдолд орсон тул өнгөрөгч 2-р сарын 29-ний өдрөөс эхлэн “Үндэсний хэмжээний гамшиг”-ийн түвшин зарлаад байгаа билээ. Түүнчлэн Малави (3-р сарын 25), Зимбабве (4-р сарын 3) зэрэг улсууд ч “Үндэсний хэмжээний гамшиг” зарласан ба Өмнөд Африкын бүсэд Эль-Ниньо үзэгдэл эрчимжиж буйтай холбоотойгоор ган гачиг, өлсгөлөн нүүрлээд байгаа юм.

НҮБ-ын Дэлхийн хүнсний хөтөлбөрийн зүгээс өнгөрсөн оны сүүлчээр буюу ган гачиг болохоос өмнө Африкийн зөвхөн өмнөд хэсгээр тогтохгүй тус бүс нутгийн хэд хэдэн хэсэгт 50 сая орчим хүн хүнсний аюулгүй байдлын асуудалтай тулгараад байгааг анхааруулсан удаатай.

Эх сурвалж: Hankyung