1995 онд Formula 1-ийн жолооч асан Герхард Бергерийн Ferrari F512M Testarossa автомашиныг гэмт этгээдүүд хулгайлсан хэрэг гарч байсан билээ. Тэгвэл гэмт хэрэг үйлдэгдсэнээс хойш 30 орчим жилийн дараа холбогдох албаныхан автомашиныг олжээ.
Тодруулбал, даваа гарагт Лондон хотын цагдаагийн газраас Герхард Бергерийн алдсан автомашиныг олж, хураан авсан гэдгээ мэдэгдсэн байна.
Автомашиныг алдах үед Герхард Бергер Итали улсад аялж байсан бөгөөд түүний хэлж байснаар түүнийг автомашины урд зогсож байхад гэмт этгээдүүд автомашиныг хулгайлсан гэсэн юм. Улмаар автомашин нь хулгайлагдахад тэр найзынхаа хамтаар гэмт этгээдүүдийг мөшгөхөөр оролдсон ч гүйцээгүй ажээ.
Тийнхүү хэрэг явдлаас хойш 30 орчим жил өнгөрөхөд ямар ч ул мөргүй байсан автомашин саяхан худалдаанд гарснаар албаныхан хулгайлагдсан байж болзошгүй хэмээн тогтоож, цагдаагийн газарт мэдэгдсэн байна. Мөрдөх ажиллагааны үеэр тодруулснаар автомашин өнгөрөгч оны сүүлээр Их Британи улсын нутаг дэвсгэрт нэвтэрсэн бөгөөд тийн нэвтрэхээс өмнө Япон улсад байсан гэнэ.
Эх сурвалж: NY Post