Мягмар гарагт Египетийн Хангамж, дотоод худалдааны яамнаас мэдэгдсэнээр тус улс ОХУ-аас 235 мянган тонн улаан буудай худалдан авах гэрээ байгуулжээ. Яамнаас баталснаар талууд гэрээг олон улсын жишигт нийцүүлэн байгуулсан гэсэн юм.
Тийнхүү гэрээний хүрээнд ирэх сарын 15-30-ы өдрийн хооронд Египет улс эхний ээлжийн улаан буудайг хүлээн авах ажээ. Энэ ээлжийн хүргэлтэд нийт 175 мянган тонн улаан буудай багтах юм. Харин дараагийн ээлжийн 60 мянган тонн улаан буудайг ОХУ аравдугаар сарын 1-15-ы өдрийн хооронд Египет улсад нийлүүлэх гэнэ.
Үйл явдлын хүрээнд ТАСС мэдээллийн агентлагаас онцолсноор ОХУ-ын Египет улсад суугаа элчин сайд өнгөрөгч зургаадугаар сард Москва, Каирын талууд барууны орнуудын хориг арга хэмжээнээс гадуур Египет улсад буудай нийлүүлэх системийг боловсруулсан гэж мэдэгдэж байжээ. Улмаар талуудын боловсруулсан систем сая биеллээ олж, ОХУ Египет улсад улаан буудай худалдах болсон байна.
Эх сурвалж: ТАСС