Холливудын од Мэтт Дэймон орон нутгийн цагаар энэ сарын 21-нд CNN телевизэд өгсөн ярилцлагадаа бүх цаг үеийн хамгийн өндөр орлого олсон "Аvatar” кинонд тоглох саналаас татгалзаж, асар их мөнгө алдсан гэдгээ мэдэгджээ.

CNN агентлагийн мэдээлснээр Мэтт Дэймон тус телевизийн "Who’s talking to Chris Wallace” нэвтрүүлэгт оролцох үеэрээ найруулагч Жэймс Камероны "Avatar” киноны гол дүрийн хамтаар киноны орлогын тодорхой хувийг түүнд санал болгож байсан талаар дурдсан байна.

Хэрвээ уг саналыг хүлээж авсан бол нийт 250 сая ам.долларын орлого олох байжээ.

Үүний зэрэгцээ “Жүжигчний карьераа эхлүүлснээс хойших хамгийн өндөр мөнгөн дүнтэй саналаас татгалзсан явдал байсан” хэмээн тэрээр харамсангуй өгүүлсэн байна.

Энэхүү саналаас татгалзах болсон хамгийн том шалтгаан нь түүний үнэнч шударга зантай холбоотой гэжээ. Учир нь 2002-2016 оны хооронд үзэгч олны хүртээл болж байсан “Bourne Identity”, “Bourne Supremacy”, “Bourne Ultimatum”, “Bourne Legacy”, “Jason Bourne” зэрэг цуврал киноны зураг авалтыг дуусгах шаардлагатай байсан аж. “Аvatar”-аас болж тус кино багийнхныг асуудалд оруулахыг хүсээгүй гэдгээ тэрээр онцлон тэмдэглэсэн байна.

Эцэст нь найруулагч Камерон гол дүрийн жүжигчнээр Сэм Вортингтоныг сонгож, "Аvatar” киноны зураг авалтыг хийсэн билээ. Тус кино 2009 онд нээлтээ хийснээс хойш дэлхий даяар 2.923 тэрбум ам.доллар олж, бүх цаг үеийн хамгийн өндөр орлоготой киноны жагсаалтыг өнөөг хэр нь тэргүүлсээр байгаа юм.

Үүний зэрэгцээ Мэтт Дэймон мөн өдөр АНУ-д нээлтээ хийсэн найруулагч Кристофер Ноланы бүтээл “Оппенхаймер" кинонд Дэлхийн 2-р дайны үед цөмийн зэвсгийн хөгжлийн анхны төлөвлөгөөг удирдаж байсан Америкийн цэргийн офицер Лесли Гроувсын дүрд тоглоод байгаа билээ.

Эх сурвалж: Maeil