Сайн менежер ихэнх цагаа ажилчдын аз жаргалтай байдлыг хангахад
зарцуулдаг. Гэхдээ багийн гишүүдтэй хангалттай харилцааг өрнүүлж чадахгүйгээс
тэднийг бүрэн таньж чаддаггүй. Тэдний хүсдэг зүйлийг мэдэхгүй бол хүссэн
зүйлийг нь өгч чадахгүй.
Нэгэнт та бусдын бодлыг унших чадваргүйгээс хойш юу хүсдэг болохыг нь шууд асуусан нь дээр. Харамсалтай нь бодит байдал дээр шударга хариу өгөх зоригтой ажилтан ховор. Тэд санал бодлоо хэлэх нь гомдоллоод байгаа мэт харагдана гэж эмээдэг. Дараа нь таагүй үр дагавар үүснэ гэж айдаг.
Нэгэнт ажилтнуудын амнаас үг гарахгүйгээс хойш тэдний асуухаас айдаг зүйлсийг бид хэлье. Хамгийн тэргүүний гурван хүсэлт бол:
- 1.Шударга төлбөр
Хийсэн хөдөлмөрийг нь үнэлж, тохирсон төлбөр төлөх зөв тэнцвэр олох хэцүү. Таны хувьд төсвөө хараад хангалттай төлбөр өгч байна гэж бодно. Гэвч тухайн ажилтны авч буй цалин нь гэр бүлээрээ амралтад явахад ч хүрэлцэхгүй тул хангалтгүй гэж үзнэ.
Энэ нөхцөлд цалингийн ил тод байдал хамгийн ихээр үгүйлэгдэнэ. Тэдэнд зөв үнэлгээтэй цалин өгч буйгаа нотлохын тулд цалинтай холбоотой тооцооллыг ил тод болгох хэрэгтэй. Цалингийн задаргааг нарийвчлан тайлбарлах албагүй боловч ямар үндэслэлээр тус хэмжээний цалин олгодог болохыг ойлгуулах хэрэгтэй.
2.Сүүлийн үеийн технологи
Вэб хөгжүүлэгчээс эхлээд дэлгүүрийн худалдагч нар технологийн туслалцаагүйгээр ажлаа хийж барахгүй. Харамсалтай нь хурдтай, хүчтэй, цаг хэмнэсэн сүүлийн үеийн технологийн өртөг өндөр тул цаг тухайд нь худалдан авдаг албан газар ховор. Үүний дүнд гурван ажилтан тутмын нэг нь ажлын газрын техник хэрэгсэл гэрт нь байдгаас хоцрогдсон гэдэгтэй санал нийлдэг.
Шинэ технологиор ажлын өрөөг тохижуулж чадахгүй бол байгаа системээ тогтмол шинэчилж (update хийх), сүүлийн үеийн програм хангамжаар хангаж байгаарай.
3. Үргэлжлүүлэн сурах боломж
Мэргэжлийн ур чадвар, оюуны чадавхиа сайжруулах нь тэдний карьерт чухал хэрэгцээтэй гэдэгт тэд санал нийлдэг. Хийх тусам гарт орно, хийх тусам суралцана гэдэг боловч үүнээс илүүг хүсэхэд буруудах зүйлгүй.
Суралцах хөнгөлөлт олгож болно. Эсвэл долоо хоногт нэг удаа ажлын хэдэн цагийг онлайн хичээлд зарцуулж болно. Ажилчдыг сургах олон арга бий. Тэр дундаас өөрийн байгууллагад тохирох нэгийг сонгоорой.