Парисын Олимпын наадамд АНУ-ыг төлөөлөн оролцох сагсан бөмбөгийн эрэгтэй шигшээ багийн бүрэлдэхүүнд Леброн Жеймс, Стефен Көрри, Кевин Дюрант, Жоэл Эмбийд зэрэг алдартай тамирчид багтсан тухай эх сурвалжууд “ESPN” телевизэд даваа гарагт мэдээлжээ.

Шигшээ багийн ерөнхий менежер Грант Хилл ирэх долоодугаар сард Лас-Вегаст бэлтгэл ба үзүүлэх тоглолт хийх хүртэл багийн нэг орон тоог нээлттэй байлгаж байгаа ажээ. Тодруулбал, шигшээ багийн 11 хүний бүрэлдэхүүнийг албан ёсоор зарлахаар төлөвлөж байгаа бөгөөд үүнд “Лэйкерс” багийн довтлогч Энтони Дэвис, “Санс”-ын хамгаалагч Девин Бүүкер, “Миннесота”-гийн хамгаалагч Энтони Эдвардс, “Бостон”-ы довтлогч Жэйсон Тейтум, “Бостон”-ы хамгаалагч Жрю Холидэй, “Майами”-гийн төвийн тоглогч Бам Адебайо, “Индиана”-гийн хамгаалагч Тайриз Халибертон нар багтжээ.

АНУ-ын багийн дасгалжуулагч Стив Керр Олимпод анх удаа оролцох гэж буй NBA-гийн дөрвөн удаагийн аварга, хоёр удаагийн үнэ цэнтэй тоглогч С.Көрриг дасгалжуулна. Мөн Олимпын эрэгтэй сагсан бөмбөгийн төрлөөс гурван алтан медаль хүртсэн хоёрхон тоглогчийн нэг болох К.Дюрантыг дасгалжуулах юм.

Харин дөрөв дэх Олимпдоо оролцох гэж буй Л.Жеймсийн хувьд 2004 онд хүрэл, 2008, 2012 онд алтан медаль хүртэж байсан билээ. 2023 оны ФИБА-гийн дэлхийн аварга шалгаруулах тэмцээнээс медальгүй хоцорсон багийн бүрэлдэхүүнээс Олимпын наадамд оролцохоор сонгогдсон хоёрхон тоглогч нь Т.Халибертон, Э.Эдвардс нар юм.

Эх сурвалж: ESPN /МОНЦАМЭ агентлаг/