Ням гарагт Атлантын далайн Ла Пальма арал дээр байрладаг галт уул дэлбэрч, галт уулын хайлмаг эргийн дагуу орших алслагдмал сууцуудыг аюулд оруулсан тул эрх баригчид хэдэн мянган оршин суугчдыг нүүлгэн шилжүүлэх болжээ.

Канарын арлын галт уул судлалын хүрээлэнгээс мэдээлснээр дэлбэрэлт өдрийн 15:00 цагийн орчимд болсон гэнэ. Улмаар галт уул дэлбэрэхтэй зэрэгцэн тэнгэрт улаан гал авалцаж, хар, цагаан утаа савссан ажээ. Тийнхүү дэлбэрэлт болохын өмнө 4.2 магнитудийн хүчтэй газар хөдөлж, дэлбэрэлтийн дараа шингэн лаав уулын уруу урссан байна.

Тус галт уулын хувьд хамгийн сүүлд 1971 онд ийн дэлбэрч байжээ.

Галт уулын дэлбэрэлттэй холбогдуулан оройн 23:00 цагийн үед Канарын арлуудын ерөнхийлөгч Виктор Торрес мэдэгдэл хийж, 5000 хүнийг нүүлгэн шилжүүлсэн хэмээсэн юм. Түүний хэлснээр нүүлгэн шилжүүлсэн хүмүүсийн ихэнх нь ойрын төрөл төрөгсдийнхөө гэрт очсон бол үлдсэн хүмүүсийг түр орогнох байранд хүргэсэн байна.

Ла Пальма арлын хувьд нийт 85 мянган хүн амтай бөгөөд Канарын арлуудад байрлах нийт 8 галт уулт арлын нэг юм.

Эх сурвалж: AP News